Tandu li dimu à u sgiò Sarkosy, presidente di a republica francese, chì a Corsica ùn hè micca a Francia è ch’è no simu corsi, puntu è basta. Ch’elli mandinu tutte e forze militare ch’elli volenu, francesi ùn seremu mai.

Di più, u presidente di a republica francese hà vulsutu fà crede ch’ellu era à l’iniziu di e riescite di l’Università di Corsica. Ùn lu pudemu micca lascià cuntà fole tamant’à ellu. L’Università hè diventata un polu di primura per ciò chì tocca à l’energie da rinnuvà in Auropa è hà uttenutu u famosu labellu CNRS per parechji duminii di ricerca da per ella, Sarkosy ùn hà fattu nunda in stu sensu.

È po s’hè permessu di parlà di a cunvenzione tripartita Università-CTC-Statu ch’ellu avia firmatu è chì u so statu ùn rispettia micca. Difatti, postu ch’ellu ci vole à ramintà la, per chì u statu francese è Sarkosy, chì l’avia firmata ellu sta cunvenzione, a rispitessinu, ci era vulsutu chì u Cunsigliu d’Amministrazione di l’Università occupessi a prifettura à trè mesi di l’alizzione presidenziale.

Per compie, Sarkosy chì si dice prontu à andà assai luntanu per ciò chì tocca à a lingua è à a cultura corse mette un limitu chì hè chì u francese devissi firmà a lingua di a republica francese. Vale à dì perchè ci vole à spiecà la, chì ùn cambiemu nunda à a situazione attuale: u corsu à a scola ma micca à paru à l’altre lingue, è à pena di corsu in più per via di l’emissione di Via Stella. Vale à dì u francese è soladimente u francese in tutti i duminii publichi di a sucetà, cusì hè sicuru chì u corsu ùn si sviluppessi micca. Dumandemu torna a cuufficializazione di a lingua corsa, sola manera di sparghje u corsu in tutta a sucetà.

Strada diritta é core in fronte!

Aidez les prisonniers politiques
Cliquez ici->