DEDICATA A NATALE LUCIANI

© Source image : Site http://canta.adecec.net/
Son livre d'or : http://canta.adecec.net/livredor/

L’Ottu di dicembre hè una data impurtantissima per a Corsica. Ghjè a Festa di a Nazione. Tocca à tutti i corsi à rammintassi di issu ghjornu fistivu in onore di a Santa Vergine.

Di ghjennaghju 1735, à l’iniziu di e rivuluzione di Corsica, i capirivuluziunarii corsi (trà i quali u babbu di Pasquale de’Paoli, Ghjacintu Paoli) dichjaronu l’indipendenza di a Corsica. Tandu, per a Corsica Cristiana, c’era un prublema. Eramu diventati genuvesi per a vulintà di u Papa chì avia rigalatu a miità di i viscuvati di Corsica à a Ripublica maritima. Dunque, dichjarà l’indipendenza saria statu una pruvucazione, ancu cinque seculi dopu, di pettu à u Papa. Ghjè per quessa chì i naziunali corsi anu postu a Corsica sott’à a prutezzione di a Vergina Maria.

Fù decisu dinù à sta cunsulta d’Orezza di u 1735 di sceglie une prighera, u Dio vi salvi Regina, cum’è cantu naziunale, a Santa Vergina cum’è padrone di a Corsica, è l’immaculata cuncizzione per bandera (a testa mora sarà scelta durante l’indipendenza 20 anni dopu). Fù sceltu dinù l’8 di dicembre cum’è festa naziunale, sempre in onore di a Santa Vergine, postu chì issu ghjornu hè quellu di a so cuncezzione, immaculata, vene à dì senza piccatu. L’ottu di sittembre, 9 mesi dopu, si fistighjeghja a nascita di a Vergine.

I rivuluziunarii corsi ùn anu pussutu mette in ballu l’indipendenza, perchè Genuva ùn l’hà micca lasciati fà. À rombu di ripressione i Genuvesi si sò mantinuti in Corsica per torna 20 anni, poi, quand’ellu hè ghjuntu Pasquale de’Paoli, hè diventata indipendendente a Corsica, è hà stupitu l’Auropa. Paoli hà fattu di a Corsica, a prima nazione dimucratica di l’Auropa muderna.

Dunque, issa festa di a Nazione corsa hè una festa storica di quelle antiche.

Chjamemu tutti i Corsi à fistighjalla, cum’è ci vole, ind’è u rispettu di a tradizione ch’elli ci anu rigalatu l’antichi. Chjamemu dinù i Corsi a mette una bandera corsa in ogni casa per stu ghjornu, in omagiu à tutti i resistenti incarcerati.