|
Cunferenza stampa di u
02/01/06
 
Prucessu Rocchi Orsoni : u
prucessu di a DNAT !
Oghje, sò ghjudicati in Parigi Ulivieru Orsini è Lucianu
Rocchi, da una corte currezziunale. Cum’è per l’altri
prucessi, u CAR piglia a parolla stu ghjornu per dà à i media l’elementi
nicissarii per capisce u cartullare.
Prima cosa à ritene, st’omi ùn sò nè banditi nè maffiosi ma
travagliadori unesti. Nanzu d’esse machjaghjoli, Ulivieru Orsini
era tittaghju è Lucianu Rocchi tinia una buttega è vendia frutti
è legumi. Si pisavanu ogni ghjornu per andà à travaglià è
avianu una vita nurmale. Ùn eranu clandestini.
Ma un ghjornu sò sbarcati i terruristi di a DNAT per arrestalli.
Piuttostu chè di passà ind’è e mani di una ghjustizia ch’elli ùn
ricunnoscenu, anu fattu tramindui a scelta d’ammachjassi. Anu
persu cusì travagliu è vita di famiglia.
Sò stati arrestati inseme di farraghju 2004. Ulivieru Orsini era
ammachjatu dapoi 7 anni è Lucianu Rocchi dapoi 4 anni è
ricercati per affari sfarenti.
Quand’elli sò stati arrestati, cum’è tutti i machjaghjoli, eranu
tramindui armati. Oghje, sò ghjudicati per stu fattu è per stu
fattu solu. Esse armatu, in Corsica, per un patriottu, vole dì
in francese “ch’ellu face parte di un associu di malfattori in
leia incù un’impresa terrurista”.
Oghje, in Parigi, sicuramente chì nimu circherà à sapè perchè si
sò ammachjati.
Ulivieru Orsini era ricircatu ind’è l’affare di u mitraglià di a
gendarmeria di San Fiurenzu. Ma in capu à qualchì mesi
d’incarceramentu è 7 anni d’inchiesta, hè statu rimessu in
libertà è ùn andarà sicuramente sin’à u prucessu postu ch’ellu
ùn li si pò rimpruvarà nulla. È Lucianu Rocchi era ricircatu per
l’affare Defenzo. Tutti quelli chì eranu incù ellu ind’è
st’affare sò stati acchitati è anch’ellu hè statu rimessu in
libertà è ùn sarà mai ghjudicatu.
Dunque, sti dui patriotti sinceri, di alta muralità, è chì anu
sempre travagliatu ind’è a so vita, s’elli passanu oghje in
prucessu, ghjè semplicementu perchè ùn anu ricusatu d’esse
arrestati, dipurtati è imprigiunati ind’è un affare per u quale
eranu nucenti. A DNAT è e so manere anu puntatu Ulivieru Orsini
è Lucianu Rocchi versu a machja, è oghje, invece di ghjudicalli
à elli, ci vularia à ghjudicà quelli chì si sò sbagliati, quelli
chì ogni settimana francanu u mare per sparghje u so terrore, i
veri terruristi in Corsica, sta ghjustizia pulitica di a DNAT.
Eranu armati, hè vera, è u CAR spera chì a so sintenza sarà in
raportu incù stu solu fattu.
A Francia vargogna
universale !
Hè mortu Francescu Casula in età di 25 anni. Era u fratellu
di Ghjuvan Cristofanu Casula, prigiuneru puliticu, è figliolu di
Lurenzu Casula. U CAR saluta a mimoria di stu giovanu corsu
chì si ne andatu è face e so parte di dolu à tutte e personne
afflitte da issa disparizione.
In issi mumenti difficiuli, sò cascate e mascare di i ghjudici
antiterruristi è anu mustratu a so vera faccia. Sentimi di
fratellanza, cumpassione, umanità sò parolle chì ùn esistenu
micca per st’omi fieri chì cunnoscenu solu u disprezzu. Quessa
si, a parolla ci hè ind’è u so dizziunariu. Sè e legge danu a
pussibilità à i ghjudici di lascià un prigiuneru andà à
l’intarru di un parente, a facenu ogni tantu, ma micca per i
Corsi. U Ghjudice hà ricusatu à Ghjuvan Cristofanu u dirittu
d’andà à l’intarru di u so fratellu è s’hè ancu permessu di
ricusalli, in issi mumenti trimendi, di passà una telefunata à a
famiglia in dolu.
A vargogna ùn si ferma quì. E cundizione di a so morte anu
dumandatu un’inchiesta.
Sò sbarcati in casa soia i sbirri di a gendarmeria è di a
pulizza. Anu fattu una sbulicata, è anu lasciatu st’appartamentu
sottu sopra, è sò partuti incù uni pochi d’affari, camisgette è
altra robba in raportu incù u naziunalisimu.
Sta mancanza di rispettu per a morte, per i morti, è per u dolu
di una famaglia ùn sò micca degni di un Statu chì si vole unu di
i più putenti di u mondu. Invece di putenza mundiale, a Francia
hè una vargogna universale. Ùn avemu micca listessi valori, per
noi hè sacra a morte. Ùn simu micca cum’è elli, è di issa
Francia quì, ùn ne vulemu più.
Petru Casanova castigatu per
delittu d’amicizia ?
Senza nisuna ragiò, senza fundamentu ghjuridicu, è senza
spiegazione, hè statu privu di tutti i so permessi di visita, à
l’epica di e feste di Natale, Petru Casanova.
Incarceratu dapoi dui anni, hè statu cundannatu à l’isulamentu
Petru Casanova, ellu chì pate digià esiliu è incarceramentu. Ùn
hà più dirittu di scuntrà i soi à u parlatoghju.
Petru Casanova ùn avia chè cinque permessi di visita è dapoi u
15 di dicembre, più nimu ùn ponu più cullassine in Parigi à
scuntrallu. L’anu decisa cusì i ghjudici, senza spiegalla, è
benintesu, senza dilla à nimu. Si ne sò avvisti i soi in Parigi
à u mumentu d’andà à u parlatoghju per purtalli a robba nustrale
di Natale, dopu à esse cullati à spese soi benintesu.
Eccuci vultati à l’epica di i Rè, à l’epica di e lettare di
“cachet”, quandu u Rè pudia mandà in prigiò à qual’ellu vulia,
senza spiegazione. Eccu ciò ch’ella hè a Francia ughjinca.
Ci pudemu dumandà, sè sta vulintà di castigu ùn hè micca in
raportu incù l’attitudine di unu di i so amichi, messu in
guardia custodia pocu tempu fà, è chì hà ricusatu di parlà è di
risponde à e dumande di a DNAT ind’è u affare per u quale ùn
avia nulla à chì vede, d’altrode st’amicu hè statu rimessu in
libertà dopu à a guardia custodia. Stu cumpurtamentu esemplariu
di stu militante hè dispiaciutu à i ghjudici anticorsi, è ci
dumandemu dunque sè stu castigu in più per Petru Casanova ùn hè
micca una manera di fà pagà u cumpurtamentu di u so amicu in
guardia custodia. Aspittemu una risposta.
Rammintemu chì a Cunvenzione Aurupeana di i Diritti di l’Omu
impone u rispettu di a libertà di cumunicazione incù tutti, ancu
per i prigiuneri (fora di l’interdizione di cumunicà in leia
incù l’affare per u quale hè imprigiunatu a personna, ciò chì ùn
hè micca u casu quì).
Ste misure nove sò castighi in più per i nostri prigiuneri è per
e so famiglie, torna una volta, i ghjudici francesi mostranu a
so vera faccia, senza umanità, senza nisun rispettu per e legge.
Sarà quessa a “Patria di i diritti di l’omu” ? Qual’hè chì a pò
crede oghje ?
A Corsica hè priva di u dirittu à u Dirittu ! Eccu a rialità di
a situazione.
Hà decisu u CAR d’appellassine à a Liga di i Diritti di l’Omu, à
Amnisty International (Londre), à u presidente di u parlamentu
aurupeanu è à a presidente di a sottu cumissione per i diritti
di l’omu, è à u cumitatu di l’ONU per u rispettu di u dirittu di
e minorità.
Basta incù a ripressione qual’è ne sia a forma !
Cumitatu contr’à A
Ripressione
|
.jpg)
