TERRITURIALE 2004,è avà  chi s’hà da passà ?

     Torna una volta, era falzu u sondage di u quotidianu unicu corsu. Ci hè da chè dumandassi sin’à quale puntu s’hè sbagliatu omu senza circà à manipulà l’elettori corsi…

Toussaint Luciani annuziatu à 2% era  cundannatu d’avanza ! Zuccarelli in prima pusizione, ghjera magaru u sognu di a direzzione du u Nice-matin, ma micca a rialità ! Sarebbe ora di falla finita incù e minipulazzione di u populu, è lasciallu sprimesi solu invece di vulè sempre parlà è pinsà à so piazza.

     Durante l’elezzione territuriale, anu messu in valore,i media francesi, u fattu chi a Corsica, prisentava u numaru u più impurtante di liste. Anu dettu dopu chè noi eramu andati i più numarosi à vutà. Ma ùn hà pinsatu omu à fà rimarcà chè noi aviamu avutu dinù u numaru u più impurtante di pricure è sicuramente l’arrubbecciu eletturale u più grande.

     In menu di 10 anni, allora ch’ellu ci hè, à pocu pressu, 10 000 abitanti in più in Corsica, unumaru d’elettori ellu hè crisciutu di …25 000 ! In 10 anni, simu passati di  170 000 elettori à 195 000. Ohimè, chi pruliferazione ! Quant’à mè, in Corsica, ci hè un virus speciale, l’elettori si miltiplicheghjanu soli…Eppò  anu quelcosa d’originale st’elettori,perchè votanu tutti per u clanu ! Quant’ à mè, li sciaccanu un vaccinu speciale per micca vutà naziunalistu...

     Malgradu l’arrubbecciu eletturale maio, a lista d’unione naziunale si face i sò 25 000 voti.

Sè no caccemu da i 142 000 vutanti tutti i morti, tutti quelli chi ùn anu micca u dirittu di votu, tutti quelli chi ùn esistenu micca, tutti quelli chi ùn sò ancu nati, tutti gendarmi o l’altri rapresententi di e forze d’occupazione culuniale è tutti l’altri funziunari francesi chi

Participeghjanu à a culunisazione di pupulamentu di a nostra tarra, qual’hè chi pudarebbe di chi i naziunalisti corsi ùn sò micca a prima forza pulitica di l’isula ?

E ùn parlu mancu di un’altra forma d’arrubbeciu eletturale, quellu di minaccia à l’impiegu.

A sà omu, nanzu ogni elezzione in Corsica u numaru d’impiegati ind’è Cunsiglii Generali o e merrie cresce quasi quant’è l’elettori ! I nostri antichi dicianu “ un ci hè un palmu di nettu” !!!

Da l’analisi generale da i media corsi, a prima lezziò di st’elezzione sarebbe u sfundamentu di i Cursisti. Hè vera chi parechje liste di cursisti ùn anu micca francatu i 5% per andà à u sicondu giru. Ma, s’ellu và appenu più luntanu omu ind’è l’analisi, vede chè infatti i Cursisti o i cusi detti prugressisti di manca è di diritta anu fattu inseme quasi 50 000 voti, vene à 20 000 di più Chè a Manca o chè a Diritta conservatrice. Un vola micca di chè una lista d’unione di i Cursisti è prugressisti avarebbe ritruvatu tutti sti voti di ch’ellu ci hè avà una parte maiò di u populu corsu prontu à fà andà avanti a Corsica. Tocca à i clanisti chi si sò impadruniti di l’assembea senza magiurità assoluta à ramentassine.

S’hè ridiculizatu Giacobbi, circandu aleanza per ogni locu, per à a fine demissiunà…Ma ùn hà micca tuttu (à partye a so cridibilita), perchè ferma sempre  presidenta di u  Cunsigliu Generale di Corsica Suprana, è hà risciutu à fà perde à Zuccarelli  l’Assemblea, puru vutandu per ellu ! U Viziu puliticu, ci hè sempre…

L’elezzione di Rocca serra hè una meza bastunata per a corsica, perchè a sa omu, stà à l’ordini di parigi, dunque, s’ellu ci hè dumane una vuluntà parigina di fà avnzà e cose in Corsicaùn sarà micca ellu à opponesi !

In francia, st’elezzione funu l’occasionne di u tarramutu trimende. U risultatu ùn ci cuncerna mancu appena, ma pudemu rimarcà chè i francesi anu cambiatu u so ministru di l’internu.

Sicodu i media francesi, u novu ministru di l’internu di a francia sarebbe un ammiratore di Fouché. Ci hè ind’è a storia francese un Fouché, diputatu di a Cunvenzione, présidente di i Giacobbini, animatore di a terore è ministru di a pulizza ma ci hè dinù un fouchet, Anzianu resistente francese, anzianu diputatu di Parigi è ambasciatore di a Francia. Stu Christian Fouchet fù dinù incaricatu da u Generale De Gaulle di mette in ballu l’autodeterminazione di l’Algéria…vidaremu frà pocu à quale si vole assumiglià villepin !

Tocc’a ellu, u novu ministru di l’internu francese, à sprimesi nant’à a questione corsa, per sapè s’ellu vole cuntinuà à cunsiderà u prublema corsu  cum’è u semplice prublema di mantene di l’ordine, o s’ellu hè prontu à fà  avanzà e cose. Rimpiazza un ministru chi ci hà purtatu di fole in canzone dirante dui anni,chi hà mandatu i patriotti corsi in prigiò à buzeffa, è chi hà ingannatu dinù e famiglie di tutti sti prigiuneri fendu crede ch’ellu appruntava l’avvicinamentu di i prigiuneri pulitichi in Corsica.

Hà fattu nice Sarkosy di vulè cuntinuà u prucessu di Matignon iniziatu da jospin, Ma stu prugettu di Jospin avia l’interessu maiò per a prima volta ind ‘è a storia di a Corsica di mette à u centru di u dibattu l’assemblea di Corsica. Allora chè per Sarkosy,l’Assemblea di Corsica ùn era più u mutore di u prugettu, ma una semplice camara d’enregistramentu di ciò ch’ellu ci vulia impone !

Dece mesi fà, vutava a Corsica per un referendum à propositu di stu prugettu mulizzosu di Sarkosy. In pienu  prucessu puliticu, ghjustu dopu à l’arrestazione d’un patriottu ricercatu, mentre chi a maiò parte di i funziunari eranu in lotta contr’a e riforme di u statu  francese…A  quistione di stu referendum ùn era micca di sapè i corsi vulianu o micca un cambiamente di l’istituzione, cum’è certi l’annu vulsutu fà crede.Infatti, a sola cosa  ch’ellu si pudia di à propositu di stu referendum, gjè(sè no pigliemu in contu l’arrubbecciu eletturale)chè una piccula magiurità di corsi ùn hà micca vulsutu di u prugettu di Sarkozy.

Ma a porta ferma aparta per un’evuluzione di l’istituzione di a Corsica chè pigliarebbe in contu a maiò parte di e rivendicazione di u naziunalismu.

A dicenu è a ripetenu i naziunalisti dipoi l’elezzione territuriale, anu iniziatu una pulitica di a manu tesa, tocca à l’altri eletti corsi è i rapresententi di u statu francese à piglià sta mane. Invece di què, vede omu chè dipoi l’elezzione ùn hà cambiatu nulla è chi a ripressione francese cuntinua sempre più forte, sempre più vigliacca. Un volenu capisce,main capu à 30 anni di ripressione,di diportazione,d’incarceramenti,è certe volte di morti,simu sempre qui arritti u pugnu pisatu, pronti à difende a patria.Allora , tocca à tutti quelli chi cundannanu da  a mane à a sera a viulenza fatta à a nostra tarra, à a nostra cultura, à a nostra lingua è à u nostru populu.

L’unione naziunale iniziata qualchi mese fà deve sbuccà nant’à un fundamentu novu di u naziunalismu. Ci hè oghje a pussibilità  per i naziunali corsi di andà versu un avvicinamentu di e pricipale forze pulitiche naziunale. Ci vole à cuntinuà ind’è a strada di l’unione, è rinfurzà e strutture publiche per esse capace di risponde à tutte e pruvucazione di u statu francese.*Forti saremu, sè uniti simu* !

                                                                                                                      Ghjuvan Filippu ANTOLINI

                                                                                                                                                                                                                                                          Prigiuneru  Puliticu Corsu